Fluguval í Affalli

Affallið er viðkvæm veiðiá og því mikilvægt að nota nettar flugur. Fáir hafa gert stormandi lukku með 2″ appelsínugulum frances með keiluhaus eða 28 gr. svörtum toby.

Ekki rétta beitan í Affallið

Síðasta sumar gerðu menn fína veiði á ýmis konar útgáfur af Sunray Shadow og litlar Snældur. Eins var frances töluvert reyndur og gaf sæmilega. Svo fóru einhverjir út fyrir mörk þess hefðbudna og tóku yfir 40 laxa á Alexöndru nr. 10.

Sunray vekur oft viðbrögð í lygnum hyljum

Fyrir þá sem hafa frekari áhuga á fluguvalinu í Affalli í Landeyjum er bent á síma veiðivarðar, 892-2637.
Þar er einnig hægt að nálgast heppilegar flugur á sanngjörnu verði. Bæði er hægt að taka stakar flugur eða sérstakan Affallspakka sem inniheldur bláan Sunray Shadow, gylltan Sunray, bláa Snældu í 1″, þýska Snældu í 1/2″ og litla Black and Blue með keiluhausi. Pakkinn kostar kr. 2.500.

Veiði hafin; upplýsingar um veiðihús

Heilir og sælir veiðimenn,

veiði hófst í Affalli í gær mánudaginn 4. júlí. Á kvöldvaktinni fékkst fyrsti laxinn í sumar, rétt tæplega 5 kg hængur úr veiðistað sem merktur er nr.2. Að auki fengu veiðimenn að slást við fimm sjóbirtinga í strengnum við Bergþórshvol.

Veiðihúsið er klárt fyrir sumarið og stendur austan við brúnna við Bergþórshvol. Staðsetningin er merkt með rauðum hring á þessari mynd:

Frekari upplýsingar munu birtast hér. Einnig er vísað á síma veiðivarðar, 892-2637.

Allt að verða klárt fyrir sumarið 2011

Kæru veiðimenn,

nú stendur yfir undirbúningur fyrir veiðitímabilið sem hefst þann 1. júlí næstkomandi.
Skemmst er frá því að segja að Affallið er uppselt að heita má í sumar. Ef einhverjir dagar losna til sölu verður upplýsingum komið inn á þessa síðu.

Gleðilegt veiðisumar!
Veiðifélag Eystri-Rangár

Sumarið 2010 gert upp

Veiðiklúbburinn Ekki Varir við veiðar í Affalli

Sumarið 2010 var merkilegt veiðiár í Affalli í Landeyjum. Áin fór í fyrsta sinn yfir 1000 laxa veiði og tók talsvert stökk úr rúmlega 100 laxa veiði árið áður. Ástæðuna má rekja til vel heppnaðra seiðasleppinga vorið 2009, en það var frumraun Veiðifélags Eystri-Rangár í sleppingum í Affallið.

 

Við Affallið

Það blés nú ekki byrlega í upphafi sumars. Óvissa um ástand nálægrar eldstöðvar gerði sölu veiðileyfa örðuga í fyrstu en öskufall var minna en fjarstaddir gátu gert sér grein fyrir. Starfsmenn Veiðifélagsins urðu varir við fiska í hyljum snemma júnímánaðar, en töldu þá vera staðbundna urriða. ,,Urriðunum” fjölgaði þó ört á neðstu svæðunum og þegar fyrstu veiðimenn mættu á staðinn varð ljóst hvers kyns var.

Þessi mynd vakti verðskuldaða athygli snemmsumars er hún birtist í veiðifréttum Morgunblaðsins. Myndin sýnir bakka Affallsins iðagræna, ekki öskugráa.

Skemmst er frá því að segja að laxagöngur komu í ánna sumarlangt og fram á haust. Flestir sem hana heimsóttu gerðu góða veiði. Besti dagurinn var 26. september, þá komu 49 laxar á land á þrjár stangir. Afraksturinn er met, 1021 lax kom á fjórar stangir úr Affalli í Landeyjum sumarið 2010.

 

Veiðifélagið Káta Ekkjan í Affalli

Ekki er unnt að lofa tilvonandi gestum þvílíkri veislu í framtíðinni. Hins vegar verður seiðasleppingum haldið áfram með sama hætti og heldur aukið við þær en dregið úr.

Veiðifélag Eystri Rangár býður ykkur velkomin til veiða sumarið 2011.  Veiðileyfapantanir má senda á einar@ranga.is.

Metdagur í Affallinu – 26. september!

Nýtt met var slegið í Affallinu í gær þegar 49 laxar komu á land. Þar af tóku 37 rauðan Frances, en 12 tóku Alexöndru. Með veiði dagsins í dag fór Affallið svo í fyrsta sinn yfir 900 laxa.

Laxinn tekinn að dreifa sér um Affallið

Þar kom að því – torfurnar sem legið hafa á neðstu svæðum árinnar hafa nú breitt úr sér. Síðustu daga hefur veiðst vel í hyljum 13 og 14, auk margra annarra frá 1-29. Veiðimenn síðustu tveggja daga höfðu 23 fiska og stendur Affallið nú í 700 löxum.

Tveir góðir

Tveir laxar af 567 úr Affallinu í sumar!

Affallið rýfur 500 laxa múrinn…

…og raunar 21 laxi betur. Sveinn Eyfjörð og félagar renndu agni í Affallið dagana 19.-20. ágúst. Að því loknu lágu 48 laxar í valnum, flestir teknir á Sunray í Skurðinum svonefnda. Með því fór Affallið yfir 500 laxa í fyrsta sinn svo mér sé kunnugt.

Káta Ekkjan í Affallinu

Veiðifélagið Káta Ekkjan lagði land undir fót þann 11. þessa mánaðar. Förinni var heitið í Landeyjarnar, nánar tiltekið að Affallinu til laxveiða.

Sólríkur dagur. Erfitt getur verið að fá laxinn til að taka við þessar aðstæður, sólin skín undir bakkana þar sem hann heldur sig.

Gunnar Sigurðsson, stud. med., þreytir lax. Gunnar Dagur fylgist með frá hinum bakkanum.

5 punda hængur kominn á land.

Undirritaður ,,með’ann”

Stór var hann ekki, en skemmtilegur viðureignar. Flestir laxanna sem komu á land voru nýgengnir, lúsugir og dýrvitlausir.

Veiðivörður gjörir kunnugt

Að gefnu tilefni skal það ítrekað að allan afla úr Affallinu þarf að færa til bókar í veiðihúsinu við Eystri-Rangá.
Fiskarnir þurfa allir að vera meðferðis til merkjaleitar, vigtunar og lengdarmælingar.

Engar undantekningar verða gerðar frá þessari reglu.
Oddur Þorri, s. 616-6080 og 892-2637